Salvador Dalí
Colección
A FNMT-RCM dedícalle ao xenial artista Salvador Dalí (1904-1989) unha segunda emisión da serie denominada Pintores Españois, coa que se lles quere render homenaxe aos creadores españois máis destacados ao longo da historia.
Esta segunda serie componse de cinco moedas de colección que recrean algunhas das obras máis coñecidas do autor.
Biografía
Salvador Dalí naceu o 11 de maio de 1904. Dedicouse ao debuxo e á pintura desde moi novo, e en 1922 empezou os estudos de Belas Artes en Madrid. Durante a súa estancia na Residencia de Estudantes mantivo unha grande amizade co poeta Federico García Lorca e o cineasta Luís Buñuel, cos que levou a cabo numerosos proxectos artísticos vangardistas.
Despois de estudar en Madrid, Salvador Dalí marchou a París e integrouse no grupo de pintores e escritores surrealistas. Deste período datan algunhas das obras que o converten nun dos máximos representantes do surrealismo, como O gran masturbador, O espectro do sex-appeal, O xogo lúgubre e A persistencia da memoria. En 1929 coñeceu a moza rusa Helena Diakonova, coñecida co sobrenome de Gala, que desde entón se convertería na súa modelo e compañeira.
Coincidindo co inicio da Segunda Guerra Mundial, Salvador Dalí e Gala establecéronse durante uns anos nos Estados Unidos, onde a súa pintura de estilo realista e onírico tivo moito éxito. Escribiu Vida secreta de Salvador Dalí e tamén traballou para o cinema, o teatro, a ópera e o ballet. Dos anos corenta datan obras importantes como Autorretrato brando con beicon frito, A cesta de pan, Leda atómica e A Madonna de Portlligat. Convertido nun dos pintores máis famosos do momento, en 1948 volveu vivir a Europa e realizou longas estancias na súa casa e taller de Portlligat.
Durante os anos setenta Salvador Dalí creou e inaugurou o Teatro-Museo Dalí, en Figueres, onde está exposta unha gran colección da súa obra, desde os inicios e as súas creacións dentro do surrealismo ata as obras dos últimos anos da súa vida. Despois de vivir durante moitos anos en Portlligat, cando morreu a súa esposa Gala trasladouse uns anos ao castelo de Púbol e pasou a última época da súa vida na torre Galatea de Figueres, preto do Teatro-Museo Dalí, onde quixo ser enterrado.
En 1983 creou a Fundación Gala-Salvador Dalí, a institución que xestiona, protexe e fomenta o seu legado artístico e intelectual.
Faleceu o 23 de xaneiro de 1989.
Obras
AUTORRETRATO CON L'HUMANITE, 1923
Esta obra representa un dos modelos do período cubista de Dalí no que segue a liña do clownismo de Rafael Barradas. Este artista uruguaio introduciu o futurismo e o cubismo que vira in situ en terras italianas e francesas. Rafael Barradas creara o denominado vibracionismo, que estaba baseado na síntese de planos cubistas e o dinamismo futurista, e esta influencia percíbese na obra de Dalí Autorretrato cubista, de 1923.
COMEZO AUTOMÁTICO DUN RETRATO DE GALA, 1933
Obra surrealista realizada por Dalí no ano 1932 na que manifesta a súa vontade por experimentar con diversos graos de terminación da imaxe.
O ESPECTRO DO SEX-APPEAL, 1934
Esta obra é coñecida co nome de Espectro da libido. Presenta algúns dos versos do poema "L' amour et a mémoire", onde o amor estaría representado por un corpo putrefacto e a memoria pola presenza dun neno pequeno: trátase do propio Dalí, situado na parte inferior dereita, vestido de mariñeiro en lembranzas dos seus anos infantís, e cun aro e un fémur que fai de vara.
TRISTAN E ISOLDA, 1944
Esta lenda medieval de Tristán e Isolda foi unha das que máis atraeu a imaxinación de Salvador Dalí. Narra a historia de dous amantes e acaba revelando o mito do amor imposible, ao que lle engade fortes compoñentes tráxicos. Salvador Dalí puido enfrontarse a un tema tan atractivo en diversas ocasións durante a década de 1940, en concreto, cando se lle encargou que realizase os escenarios para o ballet Tristán e Isolda de 1941 e para unha nova adaptación de 1944.
GALARINA, 1944/45
Antes de converterse por completo nun pintor de "estilo clásico", Dalí realiza este magnífico retrato de Gala, a súa musa, que lle levou máis de seis meses de traballo concluílo. O nome de Galarina púxollo Dalí como comparación e símil da Fornarina de Raphael.
A TENTACION DE SANTO ANTONIO, 1947
No cadro móstrase a santo Antonio Abad nun deserto, axeonllado e sostendo unha cruz feita con dúas varas para protexerse das tentacións que o atacan, co antigo xesto do exorcismo.
O cadro describe literalmente as tentacións ás que o home normalmente sucumbe: triunfo, sexo, ouro e riquezas.
RETRATO DE PABLO PICASSO NO SÉCULO XXI, 1947
Picasso sempre mantén moi bos lazos con Cataluña e desde os inicios da carreira de Dalí móstrase interesado pola súa obra. Así pois, non debe sorprendernos que na primeira viaxe de Dalí a París, o novo artista se apresure a visitar a Picasso. Este recíbeo no seu estudo e ensínalle a evolución naqueles momentos da súa obra, unha evolución que impresiona profundamente a Dalí. O novo estilo de Picasso, naqueles días bastante próximo ao de Breton, debe de inclinar por primeira vez cara ao surrealismo a maneira de pintar de Dalí.
BUSTO DE MULLER RETROSPECTIVO, 1970
Busto surrealista realizado por Dalí en 1930 e retocado en 1970.
