Don Quixote da Mancha foi escrita no século XVII por Miguel de Cervantes Saavedra, poeta, novelista e dramaturgo español, nacido en Alcalá de Henares alá polo ano 1547, e considerado como o máis grande escritor español de todos os tempos e un dos mellores escritores universais.

No prólogo das Novelas Exemplares o propio Cervantes descríbese a si mesmo:

"Este que vedes aquí, de rostro aquilino, de cabelo castaño, fronte lisa e desembarazada, de alegres ollos e de nariz curvada, malia que ben proporcionada; as barbas de prata, que non hai vinte anos que foron de ouro, os bigotes grandes, a boca pequena, os dentes nin miúdos nin crecidos, porque non ten máis ca seis, e eses mal acondicionados e peor postos, porque no teñen correspondencia os uns cos outros; o corpo entre dous estremos, nin grande, nin pequeno, a cor viva, antes branca que morena; algo cargado de lombo, e non moi lixeiro de pés; este digo que é o rostro do autor de A Galatea e de Don Quixote da Mancha, e do que fixo a Viaxe ao Parnaso, a imitación da de César Caporal Perusino, e outras obras que andan por aí descarreiradas e, quizais, sen o nome do seu dono. Chámase comunmente Miguel de Cervantes Saavedra. Foi soldado moitos anos, e cinco e medio cativo, onde aprendeu a ter paciencia nas adversidades. Perdeu na batalla naval de Lepanto a man esquerda dun tiro de arcabuz, ferida que, aínda que parece fea, el ten por fermosa, por cobrala na máis memorable e alta ocasión que viron os pasados séculos, nin esperan ver os vindeiros, militando debaixo das vencedoras bandeiras do dillo do raio da guerra, Carlo Quinto, de felice memoria."

Logo de facer 50 anos, e sendo autor de varias obras de poesía, teatro e novela, publicou O enxeñoso fidalgo Don Quixote da Mancha, co que tivo un éxito inmediato, aínda que non lle resolveu as dificultades económicas que dominaron a maior parte da súa vida. Poucos anos despois editouse a copia escrita por Alonso Fernández de Avellaneda, o que motivou a Cervantes para completar a segunda parte de O Quixote, publicada en 1615 con frecuentes alusións ao "falso Quixote".

" ... entrou acaso o alcalde da vila no mesón cun escribán, ante o cal alcalde pediu don Quixote, por unha petición, de que lle conviña ao seu dereito que don Álvaro Tarfe, aquel cabaleiro que alí estaba presente, declarase ante a súa mercé como non coñecía a don Quixote da Mancha, que así mesmo estaba alí presente, e que non era aquel que andaba impreso nunha historia intitulada Segunda parte de don Quixote da Mancha, composta por un tal de Avellaneda, natural de Tordesillas."

Morreu o 23 de abril de 1616, día declarado pola UNESCO como Día Mundial do Libro.